Thu, 23 May 2024

HEADLINES :


I Toitom I Tosindak
Published on: Saturday, April 13, 2024
Text Size:

I Toitom I Tosindak
Pobuhagas tinan di mamai Soimon. Poinsouva isido do kukumuton tanauu takod om oitom pasalangkai. Agazo takod di souva disido. Indau’ no isido di tukad hamin dau poingginding do gantang kisuang do paai poninduk di manuk ngaavi do doungosuvab di. Nopitanga’ i gantang. Notinong i manuk ngaavi’. Biio’ nopo disido nga’ amamaa’ po i taino’.

Pongiizak no isido. Insan induvo. Kointohu nopo om nokokuub i manuk santatangkus minimbuhai mantad di tisan do tahun. Noguumungan isido. Tovukai no disido di paai mantad suang gantang. 

Kivaa songinan tandaa’ minomogusa’ di maganak. Nouzazang i susuvai manuk di mamaso moninduk. Mininggiliputon i maganak di hivang ponindukan. Huminisang om undoong no di puun tulod-ulod. I tandaa’ nga’ suminakai di maganak mantad kointut. Oduuk nopo om pihangkab no. Nokongingis i mamai Soimon.

“Koontohu’ ko nopo anuk om aabak, kasapou kou no daa,” ka disido.  

“Mon! Au’ ko dumahin dino?” ka di sinavaan disido zi inai Mili.

“Posodian po dogo’ i gaung poobuvat. Mooi zou po podu’ duhia id bavang,” ka di mamai Soimon.

Koikot nopo isido doiho’ id tisan di bavang om piovo-ovo no mongiho nung kivaa nokopoguhu mimpodu’ toi’ tumahib. Aiso. Ginahus disido i kukumuton tanauu takod om pasapazo no di saki’ tamahang. Noinsanan tinan disido do pobuhagas.

Tinombo disido i papaangan dau do pahad om obug no doid vaig.

Nokoolog i tinan disido toduuk nga’ kotohop nopo toinsanan tinan om natagak i sinogit nopiumanan disido. Nisu’ disido i tinan dau do sabun sunlight. Noongidan isido di sabun. Sabun sunlight no i kabazagan do tuhun kampung do timpu dii. Aiso noihaan dioho’ di sususvai sabun. Sabun sunlight pongisu’ tinan ontok mimpodu’. Pomupu’ nogi’ do kain. 

Sakahi’ po om kivaa ohou noongou disido. Higao’ disido om kivaa duvo tuhun koonduan poingabot do tapi’ toitom. Natakapan o kangkab gisom doid totud.

Humaang nopo om osohiduk di mamai Soimon do popupuak di huak dioho’. Poinsuun izioho’ do mimpun kisuang do kain. Nobungad i tobuk dioho’ om kadansaan di i mimpun pointampak tuhu. Ololok izioho’ mamaso munduk di tisan bavang.

Notigagang i mamai Soimon. Pobulagoi isido mimpodu’ doid vaig om doiho’ i kukumuton disido poinsavit do saki’ tamahang id tinda. Osikap isido do minananago.

Tuminood i duvo koonduan doiho’ id piang di bavang. Nokivatan dioho’ do kivaa souva toitom ponong puun tamahang.

“Odoi! Mimpodu’ ko magahong?!” ka di songuhun koonduan.  

Tuminohikud i mamai Soimon. Kivaa kaaka nakagazat di mato disido doiho’ id soboong bavang. Koosi isido do okito di koonduan i toguvang disido. Oniting i vaig bavang om osobot do mato i tavak disido gisom doid papaangan. Otudungan nopo di koonduan doiho’ id tinda om talang-talang i di pongikuman disido.

“Podu’ no magahong. Mooi zikoi duhia id saazo,” ka di koonduan. Hinosok dosido i kidum dau koosi okosupan di mamai Soimon.

“Momupu’ kou?” ka di mamai Soimon. Ingkakaa no nohombusan disido moboos. Nohibabaan isido nokosupan di duvo tuhun koonduan pobulagoi doid tanga’ bavang.

Ahahaid nodii o kinotuunan disido doid bavang. Nosoou disido do i sinavaan disido nga’ munduk nogi’ do momupu’ om mimpodu’ do kosuvabon dii. Nokoosi isido do okosupan di inai Mili sinavaan dau songovian di duvo tuhun koonduan.  

Kotiung i kozo i duvo koonduan di puun tamahang doiho’ id toinsazaan pinoduon di mamai Soimon om takapai no disido do pahad i toguvang papaangan dau.

Minanangkus isido minaganu di kukumuton dau om potogopo’ no zinopos tinan dau. Nomiasan i souva toitom disido nga’ husabai nopo. Nokoikot i kozo isido di sosoiba hamin om mamaso no mindau’ zi inai Mili poingabot tapi’ toitom om poingginding sombolidi’ kain pupuan.

“Nokoonos no dati’ i naig do nansak ku dii. Sosondii’ sumauk di pinasakan tuongou om makan no haid iziau,” ka di inai Mili.

Osonod i mamai Soimon do minakan kosuvabon dii. Kakaal i doiho’ id bavang o tosoou disido. Ologot nopo daa i duvo koonduan do minonongkiboos disido om tantu’ okosupan di sinavaan disido. Nokoosi isido.

Kavavagu po kinasavaan disido di inai Mili. Aiso po do tohid tinan. Osondiian dioho’ mogigizon di hamin vinaa dioho’. Poimpidan mantad di hamin di mohoing disido.

Suminandad izioho’ do mininsosondii’. Piniangazan disido om di inai Mili do au’ mudson doid hamin do mohoing. 

“Nogonop no do natanggung do mohoing i nopung, balanja’ matod om notungkusan do sakaping tana’ buvaton. Kalabau po nga’ noobian do poobuvat,” ka haid di ina’ di mamai Soimon di kasasavo po disido. Otopot om nakatantang doid tutok di mamai Soimon. Au’ minooi usod di mohoing disido. Au’ nogi’ tuminopik doid hamin di tivanon disido.

Naamot do oikot timpu tumuun doid anau toun dii, kinibitan i mamai Soimon di mohoing disido do duvo pasang manuk do maan gompizo’. Kotuidong nopo i hamin dioho’ om obono’ no disido i sampangan di puzut hamin dinadi disido do pindaho manuk. Tinadaan disido do bangkaha’ pogogontohuan manuk. Osikap do nakapaganak i manuk di mamai Soimon. Ongohidas i pizak tu’ ogonop do tombihod poninduk di mamai Soimon. 

Agazo i koumbizaan di tivanon di mamai Soimon. Ogumu’ o umbizo songinsuni om miho no do tagadon ponumad do vogok. Nokoiho isido do sonongon i hongon dau do momuazam miaga di timpu minggagazo nogi’ isido.

Osikap do obinggazaan do vogok. Minonoodo isido kukuungan vogok doiho’ id sosodu’ di hamin disido. Ouhan i isido do nokopongo di husap pomogompizan do vogok.

Obobot i poing songinsuni doid tisan do tahun di vinaahan disido. I no hangod poing tomimiaga i do gontis ginazo o tinagad om tinoodo disido do lantai om tohig di kukuungan. I nopo pinanaap nga’ loun umbizo di sinasa’ om toduko’ no di inai Mili doid sosoutan.

“Modtikopongo no o kukuungan nu Mon. Ongoi zou po uot di mohoing ku nung kaanu popoutang do sapasang no di kakang dioho’,” ka di inai Mili.

Nounsikou i mohoing dosido do osikap do koungkakod mogigizon sosondii’ zo inai Mili om di monongivan dioho’ zi mamai Soimon. Nonuan izioho’ do duvo pasang kakang.

“Moongoi nopo tagad di umbizo Mon,” ka di ama’ di inai Mili.

“Mooi zou do tiinu’ maman. Susumadon kupo haid do kinambang loun guo i kakang om mooi zou nogi’ tagad di umbizo. Nga’ pohuvon kupo haid om i nopo lipou natandas nga’ ponumad ku di kakang,” ka di mamai Soimon.

“Poompiton zou no gia di natok nu, Mon,” ka di ama’ di inai Mili.

Toun nopo do minisasavo zo mamai Soimon di inai Mili nga’ di toun 1953. Nosusu i tanak totuo dioho’ di toun sumusuut ontok pangangamatan. Tondu’ i tanak. Kusai no daa haid ii tihahansan id daasom ginavo di mamai Soimon. Nga’ kobisaai nopo di ina’ disido do nokoohus o voos di topodo’ di kovovooso’ disido om nohiivan disido i inuntingaan ginavo dau. Navahiu do minunsikou isido. Au’ miho booson inondos disido nobisaan do nokoomit i tanak kohohodi’ do voos disido.

“Ogingo om koinsasamod iho’ mato tanak nu Mon. Miaga diau. Miaga kono diho’ o nakagazat dogo’ guminavo diau,” ka di inai Mili poingkibit di topodo’ di nosusu nogi’. “Isai pomungaan tokou?” ka di mamai Soimon.

“Diau no pandai dino. Pihi’ nu nopo nga’ kapakazan ku nogi’,” ka di inai Mili.

Ingkaa no do nopungaan i tanak koiso’ di mamai Soimon do i Juli. Osundu i pagaganak di mamai Soimon om di inai Mili. Nokobobozo di sinapou di manuk di ginompi dioho’. I vogok nga’ guminumu’. I pobuvatan dioho’ nga’ minogkongoo’. Noimatan dioho’ do minomohi di soikal anau bubuvaton doiho’ id soboong bavang.

Au’ nopiumanan toun tuminahib. Nakasakag do himo tuhun zo mamai Soimon om di inai Mili. Duvo kusai om tohu tondu’.

“Ingkakaa no motuu o suang ku Mon. Kotohuadan doid Kinoingan,” ka di inai Mili. Nokotood zi inai Mili do minagaganak di minhahangai tovudut no i totuo dosido i Juli.

Opod om himo toun. Nakahantoi no do Form Three. Au’ nodii manambasaan i mamai di kukumuton tanau takod toitom om polongkozob. Kobohi nodii isido do souva doid kadai. Zi inai Mili nga’ koiho nodii do manantapi’ do sarung kebaya miaga di zombituon wayang Saloma. Okon nodii ko mangabot tapi’ toitom ponokop kangkab gisom totud.

Nakavaa do hamin papan om ziing i mamai Soimon. Atagap. Tinadaan disido do apat himput toodopon pinogobi’ disido di tanak ngaavi’ disido i sanggagazo. Hohobi no di tondu’. Au’ nodii kosudong do piusodon o kusai om tondu’ doid iso’ hinimput.

“Au’ zou nokopiuman do nosukadan do tanak, Mon. Kivaa duvo tanak vagu minombo doiti’ daamin di koniab,” ka di inai Mili.

“Mantad nombo o tuhun ngaavi’ dino?”

“Mantad duhia bugus ka.”

“Monguo zioho’ doiti?”

“Koiho kono do kivaa nodii toomis ontiingon doiti’ daamin,” ka di inai Mili.

“Mogunsamang! Posikulon po zi Juli,” ka di mamai Soimon.

“Kada’ kakakat do moboos Mon. Ouzazang o balakat.”

Minogumpongus i mamai Soimon, “Kadadaao’ do mamagazo om poposikul tanak om sanang-sanang do mooi pogkotu’ di ginggiliton ku,” ka disido.

Au’ nokokodos i mamai Soimon nga’ nokouot di Juli, “Isai baka o tanak vagu do minikot doiti’ daamin?”

“Tampon ku sumikul gia zioho’ di ama’. Monuu’ dogo’ do mooi umpazat do piboian gavanus do vuhan kohimo,” ka di Juli.

“Monongkibai’ do Unduk Ngadau? Doid nombo?” ka di mamai Soimon.

“Doiti’ nopo id kampung tokou ama’,” ka di Juli.

Katahib nopo o minggu’ dii om tibudango i di duvo tuhun tanak vagu nokoikot doid daamin di mamai Soimon. Kivaa do bakul kalatas pinataak dioho’ di Juli. Kosuungai nopo di Juli i mamai Soimon do kupi’ om i tanak vagu om suvon no zosido di himput toodopon dosido.

“Pakalaja kou no ondu’?” ka di mamai Soimon.

“Au’ po mamai. Nakapaas nogi’ do Form Three. Nga’ tumihombus po vagu zikoi sumikul. Ingkuo zi Juli? Au’ nu posikulon zosido?” ka di songuhun tanak vagu.

“Ingkaa nogi’ daa nosoou ku. Ada’ nopo kivaa mooi pomuaboi dosido,” ka di mamai Soimon. 

“Kada’ po mamai! Posikulon no zosido. Sundung i do tondu’ zosido nga’ hobi pinandai dosido mantad dagai,” ka di tanak vagu. Noinsasamadan ginavo di mamai Soimon. Aiso nodii koosi disido do okotu’ i vusak togingo di au’ kozuuan disido.

“Toimoo no diozu! Monintogu’ koiso’ Tati Juli Soimon Somido!” ka di ohou mantad hinimput toodopon di Juli.

Habus no o songuhun hahangai poinbasaan boludu’ toitom. Kisinuangga’ toitom, Tapi’ toitom. Nosilingan do amas om mihap-kihap. Nohopot o puun tavak do tangkong om tiinggatai no do himpogot. Nokoimbuhai giningo di kangkab dosido. Puun poo notinggaatan do himpogot.

Tobuk nga’ tinimbuku poimbungad. Nabadakan o voos om aagang o munung. Kopitahos nopo i siling amas om boludu’ toitom om navahiu i hahangai poimbasaan do gavanus.

“Ototopot do ziau ino Juli?” ka di mamai Soimon.  





ADVERTISEMENT






Berita Utama Hari Ini

Berita Popular


Follow Us  




Follow us on             

Daily Express TV  







close
Try 1 month for RM 18.00
Already a subscriber? Login here
open

Try 1 month for RM 18.00

Already a subscriber? Login here